ट्रम्पको ट्यारिफले फेसनको आपूर्ति शृङ्खलामा झट्का, कुन ब्रान्डको सेयर मूल्य कति घट्यो ?

एजेन्सी । अमेरिकाका राष्ट्रपति डोनाल्ड ट्रम्पले बुधबार लगभग एक शताब्दीकै सबैभन्दा उच्च कर घोषणा गरेपछि विश्वव्यापी फेसन उद्योग स्तब्ध बनेको छ । सबैभन्दा ठूला पोशाक उत्पादनलाई केन्द्रित गरिएको करले फेसनको आपूर्ति शृङ्खलाभरि झट्का लाग्ने विश्लेषण गरिएको छ ।

उनले गत बुधबार ह्वाइट हाउसबाट सम्बोधन गर्दै सबै आयातित सामानहरूमा १० प्रतिशत आधारभूत कर घोषणा गरे। यद्यपि, अमेरिकाले व्यापार घाटा बढी हुने लगभग दुई दर्जन देशहरूमा करहरू उल्लेखनीय रूपमा उच्च राखेका थिए । जसमा धेरै फेसन उद्योगका ठूला उत्पादन कम्पनीहरुलाई केन्द्रित गरिएको थियो ।

अमेरिकाले चीनपछि दोस्रो ठूलो पोशाक निर्यातकर्ता भियतनामबाट आउने सामानहरूमा ४६ प्रतिशत, कम्बोडियामा ४९ प्रतिशत र बंगलादेशमा ३७ प्रतिशत शुल्क लगाइसकेको छ । पहिले घोषणा गरिएका शुल्कहरूमाथि चीनमा ३४ प्रतिशत नयाँ शुल्क लगाइएको छ भने यो सँगै चीनलाई ५४ प्रतिशत कर लाग्ने छ । यस्तै ट्रम्पले इयुलाई २० प्रतिशत कर शुल्क लागाएको छ ।

योसँगै संयुक्त राज्य अमेरिका फेसन उद्योग संघ (युएसएफएआई) ले एक प्रेस विज्ञप्ती जारी गर्दै ट्रम्प प्रशासनले सबै आयातहरूमा नयाँ शुल्क लगाउने निर्णयबाट निराश भएको भन्दै यो कार्यले विशेष गरी अमेरिकी फेसन ब्रान्ड र खुद्रा विक्रेताहरूलाई असर गर्ने बताएको थियो ।

अमेरिकाको यस घोषणा सँगै ठूला फेसन ब्राण्डहरुको सेयरमा एकाएक गिरावट आएको छ । यस अवधिमा लुलुलेमोनको शेयर १० प्रतिशत, नाइकी र राल्फ लरेनको शेयर ७ प्रतिशत, टेपेस्ट्री, क्याप्री र पिभिएच कर्पोरेशन लगभग ५ प्रतिशतले घटेको छ ।

चीन, मेक्सिको र क्यानडाबाट आउने सामानहरूमा ट्रम्पको अघिल्लो करहरू पछ्याउने नयाँ शुल्कहरूले लागत बढाउने र असंख्य फेसन व्यवसायहरूको लागि अशान्ति निम्त्याउने जानकारहरुले बताएका छन् ।

अमेरिका कपडा र जुत्ताको विश्वको सबैभन्दा ठूलो उपभोक्ताहरू मध्ये एक हो, जसले यसलाई अमेरिकी र अन्तर्राष्ट्रिय कम्पनीहरू दुवैको लागि अत्यन्त महत्त्वपूर्ण बजार बनाउँछ। अमेरिकाले आफ्नो ९८ प्रतिशत भन्दा बढी कपडा र लगभग ९९ प्रतिशत जुत्ता आयात गर्ने भएकाले देशमा बेचिने लगभग हरेक फेसन वस्तुमा थप शुल्क लाग्ने छ।

ट्रम्पको अघिल्लो ट्यारिफ घोषणा पछि, वालमार्ट जस्ता कम्पनीहरूले पहिले नै आपूर्तिकर्ताहरूसँग वार्ता गर्ने र लागत घटाउन आग्रह गर्ने बताएका थिए । अत्यधिक ट्यारिफहरु अन्य मुलुकका लागि मात्र नभएर अमेरिकी व्यवसाय र उपभोक्ताहरूको लागि बढी चिन्ता र अनिश्चितता निम्त्याउने अन्य सरकारी अधिकारीहरुले बताएका थिए ।

यस्तै खेलकुद ब्रान्डहरू पनि ट्यारिफबाट जाेगिन विभिन्न उपायहरकाे खाेजिमा छन् । चीनबाट आफ्नो सोर्सिङलाई विविधीकरण गरिरहेका खेलकुद ब्रान्डका व्यवसायीहरूले अहिले

अत्यधिक करका कारण खेलकुद ब्रान्डहरू पनि दबाबमा छन्। ट्रम्पको पहिलो कार्यकालमा उच्च शुल्कका कारण चीनबाट धेरै उद्योगहरु भियतनाम र कम्बोडिया जस्ता ठाउँहरूमा सारिएका थिए । तर अब, ती देशहरूमा पनि लागत फेरि बढ्दै गएको छ। अमेरिकामै आफ्ना उत्पादनहरू बनाउनेहरू पनि अझै पनि अन्य देशहरूको कच्चा पदार्थमा निर्भर छन्। त्यसैले आगामी दिनमा यस्ता उद्योगले नयाँ समस्याहरूको सामना गर्ने सम्भावना देखिएको छ।