वैदेशिक व्यापारको आकार १५ खर्ब नजिक, ६५ प्रतिशत बढ्याे निर्यात
काठमाडाैं । चालु आर्थिक वर्ष २०८१/८२ को ९ महिनामा मुलुकको आयात र निर्यात दुबै बढेकाे छ । चालु आर्थिक वर्षकाे चैत मसान्तसम्म आयात १२.१८ प्रतिशत र निर्यात ६५.१६ प्रतिशतले बढेकाे छ ।
भन्सार विभागको तथ्यांक अनुसार २०८१/८२ को चैत मसान्तसम्म नेपालले १३ खर्ब ९ अर्ब ५३ करोड रुपैयाँ बराबरको वस्तु आयात भएको छ, भने १ खर्ब ८८ अर्ब १९ करोड रुपैयाँ बराबरको वस्तु निर्यात गरेकाे छ ।
गत वर्षकाे यस अवधिमा ११ खर्ब ६७ अर्ब ३६ कराेड रूपैयाँ बराबरकाे वस्तु आयात भएकाे थियाे भने १ खर्ब १३ अर्ब ९४ कराेड रूपैयाँ बराबरकाे वस्तु निर्यात भएकाे थियाे ।
आयात र निर्यात दुबै बढ्दा पनि मुलुककाे कुल व्यापार घाटा पनि बढेकाे छ । चालु वर्षको ९ महिनामा ११ खर्ब २१ अर्ब ३३ करोड रुपैयाँ बराबर व्यापार घाटा व्यहाेरेकाे छ । अघिल्लो वर्षको सोही अवधिमा १० खर्ब ५३ अर्ब ४२ करोड रुपैयाँ बराबर व्यापार घाटा रहेको थियो । गत वर्षकाे यसै अवधिकाे तुलनामा व्यापार घाटा ६.४५ प्रतिशतले बढेकाे हाे ।
विभागको तथ्यांकअनुसार यस अवधिमा मुलुकको कुल वैदेशिक व्यापार १६.८९ प्रतिशतले बढेको छ। गत वर्ष १२ खर्ब ८१ अर्ब रुपैयाँ रहेकोमा अहिले १४ खर्ब ९७ अर्बको वैदेशकि व्यापार भएको छ।
