२२.५ मेगावाटको माथिल्लो ठूलो खोलाको सिभिल र हाइड्रो मेकानिकलतर्फका कार्य सम्पन्न

काठमाडौं। निर्माण क्षेत्रमा आफ्नो छुट्टै पहिचान बनाउन सफल देव ऊर्जा निर्माणले २२.५ मेगावाटको माथिल्लो ठूलो खोला जलविद्युत परियोजनाको सबै मुख्य सिभिल र हाइड्रो-मेकानिकल कार्यहरू सम्पन्न गरिसकेको छ।

देव ऊर्जा निर्माणले २०८१ को माघ महिनाको मध्यसम्ममा सिभिल र हाइड्रो-मेकानिकल कार्यहरू सम्पन्न गरिसकेको छ र इलेक्ट्रो-मेकानिकल टोलीलाई काम हस्तान्तरण पनि गरिसकेको छ। माथिल्लो ठूलो खोला ‘ए’ जलविद्युत परियोजनाको इलेक्ट्रो-मेकानिकल कार्य हाल भारतको बिएफएल कम्पनीले गरिरहेको छ।

परियोजना निर्माणको क्रममा, प्रत्येक वर्ष लगभग चार महिना ‘मलङ’ भन्ने ठाउँमा पहिरो जाने गर्थ्यो, जसले गर्दा काम पूर्ण रूपमा अवरुद्ध हुन्थ्यो, निर्माण अवधिमा हेडवर्क्स र पावर हाउस क्षेत्रमा विभिन्न समयमा पहिरो जाने र वर्षा र हिउँका कारण विभिन्न अवरोधहरू आइरहँदा पनि, देव ऊर्जा कन्स्ट्रक्सनको दृढ विश्वास, अथक परिश्रम र निरन्तर प्रयासका कारण, हामीले सिभिल र हाइड्रो-मेकानिकल कामहरू समयभन्दा अगाडि नै पूरा गर्न र परियोजना सफलतापूर्वक इलेक्ट्रो-मेकानिकल टोलीलाई हस्तान्तरण गर्न सक्षम भएकाे देव ग्रुप अफ कम्पनीका प्रमुख कार्यकारी अधिकृत (सीईओ) नवीन सिलवालले बताएका छन् ।

२०७९ साल फागुन १५ गते भूमिपूजन समारोहका साथ माथिल्लो ठूलो खोला जलविद्युत परियोजनाको सिभिल र हाइड्रो-मेकानिकल कामको औपचारिक उद्घाटन गरिएको थियो। त्यसपछि २०८० साल बैशाख महिनादेखि देव ऊर्जा निर्माणले सिभिल संरचनाको मुख्य काम सुरु गरेको थियो।

यो आयोजना सम्पन्न हुने मिति २०८२ असोज १२ गते तोकिएको भएपनि कम्पनीका प्रमुख वित्तीय अधिकृत प्रदीप खतिवडाले सोभन्दा अगाडि नै आयोजना सम्पन्न गरी राष्ट्रिय प्रसारण लाइनमा जोडिने जानकारी दिएका छन्। ठूलो खोला जलविद्युत् लिमिटेडद्वारा निर्मित यस आयोजनाको लागत ३ अर्ब ९४ करोड रुपैयाँ अनुमान गरिएको छ। जसमध्ये ७५ प्रतिशत ऋण र २५ प्रतिशत इक्विटी हुनेछ। सिटिजन्स बैंकको नेतृत्वमा कृषि विकास र माछापुच्छ्रे बैंकले यस आयोजनामा ​​लगानी गरिरहेका छन्।