निर्जीवन बीमा : मोटर र सम्पत्ति बीमा व्यवसाय क्रमिक उकालो, कृषि र हवाई बीमा भने निरन्तर घट्दै

काठमाडौं । निर्जीवन बीमा व्यवसायमा सबैभन्दा ठुलो हिस्सा रहेको मोटर बीमा ५ प्रतिशत वृद्धि भएको छ । आठ महिनामा निर्जीवन बीमा कम्पनीहरुले मोटर बीमा मार्फत साढे ८ अर्ब रुपैयाँ बीमा शुल्क आर्जन गरेका छन् ।

नेपाल बीमा प्राधिकरणका अनुसार चालु आर्थिक वर्षको फागुन मसान्तसम्ममा आइपुग्दा कम्पनीहरुले कुल ८ अर्ब ६० करोड ७ लाख रुपैयाँ बीमा शुल्क आर्जन गरेका छन् । यो गत आवको सोही अवधिको तुलनामा ५.१६ प्रतिशत बढी हो ।

गत आवको आठ महिनामा कम्पनीहरुले ८ अर्ब १७ करोड ८७ लाख रुपैयाँ बीमा शुल्क मोटर बीमा मार्फत संकलन गरेका थिए । कुल व्यवसायमा मोटर बीमाको हिस्सा ३०.०६ प्रतिशत योगदान छ । मोटर बीमा बीमा शुल्क आर्जन वृद्धि भएता पनि यसको बीमालेख बिक्री भने ९.०१ प्रतिशत घटेको छ । आठ महिनामा कम्पनीहरुले १० लाख ३४ हजार ५६ वटा मोटर बीमालेख बिक्री गरेका छन् ।

यता, सम्पत्ति बीमा व्यवसायमा दोहोरो अंकले वृद्धि भएको छ । गत आवको फागुन मसान्तसम्ममा कम्पनीले सम्पत्ति बीमा मार्फत ६ अर्ब ४३ करोड ६४ लाख रुपैयाँ बीमा शुल्क आर्जन गरेका छन् । तर, चालु आवको सोही अवधिमा भने ११.३३ प्रतिशत बढेर ७ अर्ब १६ करोड ५७ लाख रुपैयाँ बीमा शुल्क आर्जन गरेका छन् । कुल निर्जीवन व्यवसायमा सम्पत्ति बीमाको योगदान २५.०५ प्रतिशत हुन आउँछ । सम्पत्ति बीमालेख बिक्रीदर पनि ४.२४ प्रतिशत घटेको छ । समिक्षा अवधिमा कम्पनीहरुले ३ लाख २१ हजार ७१ सम्पत्ति बीमालेख बिक्री भएका छन् ।

हाल सरकारले मोटर र सम्पत्ति बीमालाई अनिवार्य गरेको छ । नेपालमा कानुनी रुपमा अनिवार्य गरेपछि दुवै बीमाको व्यापार बढ्दो नै छ । पछिल्लो सवारी साधान खरिदबिक्री बढ्दै गएपछि नै मोटर बीमा व्यवसाय पनि वृद्धि भएको छ । यता, बैंकबाट कर्जा लिँदा पनि सम्पत्तिको बीमा पनि अनिवार्य छ । यसले पनि व्यवसायको दायार थप बढ्दै गएको हो । कुल व्यापारमा मोटर बीमा र सम्पत्ति बीमाको हिस्सा ५५.११ प्रतिशत हुन आउँछ ।

समग्रमा निर्जीवन बीमा व्यवसायभ ने ८.९ प्रतिशत वृद्धि भई २८अ र्ब ६० करोड ८४ लाख रुपैयाँ पुगेको छ । समिक्षा अवधिमा कम्पनीहरुको बीमालेख बिक्रीदर पनि ५.६७ प्रतिशत वृद्धि भई २० लाख ७३ हजार ४६३ वटा पुगेको छ ।

प्राधिकरणका अनुसार लघुबीमा व्यवसाय विस्तारमा पनि कम्पनीहरु निकै आक्रामक देखिएका छन् । कुल व्यवसायमा न्युन हिस्सा रहेता पनि बीमा शुल्क आर्जन भने ४०६.८१ प्रतिशत वृद्धि भएको छ। लघुबीमा मार्फत कम्पनीहरुले ५९ करोड १० लाख रुपैयाँ बीमा शुल्क आर्जन गरेको छ ।

यस्तै, सामुन्द्रिक बीमा पनि २५.१९ प्रतिशत, इन्जिनियरिङ तथा ठेक्का बीमा १५.३५ प्रतिशत वृद्धि भएको छ । चालु आवको आठ महिनामा कम्पनीहरुले सामुन्द्रिक बीमा मार्फत १ अर्ब ६६ करोड ४३ लाख रुपैयाँ र ४ अर्ब ६३ करोड ८४ लाख रुपैयाँ बीमा शुल्क इन्जिनियरिङ तथा ठेक्का मार्फत संकलन भएको छ ।

तर, कृषि तथा बाली बीमा भने क्रमश घटेको छ । समिक्षा अवधिमा कम्पनीहरुको कृषि बीमा व्यवसाय २५.९ प्रतिशत घटेर १ अर्ब ९ करोड १७ लाख रुपैयाँ कायम भएको छ । कम्पनीले कृषि बीमालेख बिक्री पनि ९.४७ प्रतिशत घटेको देखिन्छ । गत आवको फागुन मसान्तसम्म कम्पनीहरुले १ लाख ८ हजार २३ वटा कृषि तथा बाली बीमालेख बिक्री गरेका थिए । तर, चाल आवको सोही अवधिमा भने ९७ हजार ७८४ वटा मात्रै बीमालेख बिक्री गरेका छन् । यता, हवाई बीमा व्यवसाय पनि २.९३ प्रतिशत घटेर १ अर्ब ६७ करोड ९७ लाख रुपैयाँ कायम भएको छ ।