धमिलो पानीमा माछा मार्दै वर्षमानः अर्बौँ राजस्व छलि हुनेगरी नीतिगत हेरफेर
![](https://www.arthapath.com/wp-content/uploads/2024/06/Hell-barshaman.jpg)
३० खर्बको आईटी निर्यात गर्ने, लगानी दशक घोषणा गर्नेजस्ता लोकप्रिय सपना बाँडेर अर्थमन्त्री वर्षमान पुनले राज्यको ढुकुटीमा अर्बौँको आघात पुग्ने गरी ऐन संशोधन प्रस्ताव लगेका छन् । यो कानून पारित भए सरकारले अर्थ्याएजस्तो साना उद्यमीलाई होइन, अर्बपति ब्यापारीहरुलाई नै लाभ हुने छ ।
काठमाडौँ । ‘सूचना प्रविधी क्षेत्रलाई प्रोत्साहन गर्ने’ लोकप्रिय तर्कको आडमा अर्थमन्त्री वर्षमान पुनले ठूला ब्यापारीहरुलाई अर्बौँ राजस्व छल्ने बाटो खोलिदिएका छन् । उनले आयकर ऐनको दफा ५७ लाई संशोधन गरेर कर छलिको मेसो मिलाइदिएका हुन् ।
नयाँ बजेटको अंशको रुपमा संसदमा प्रस्तुत भएको आर्थिक ऐनको संशोधन प्रस्तावमा यस प्रकारको व्यवस्था गरिएको छ । उक्त व्यवस्था सदनबाट पारित भयो भने कयौँ ठूला ब्यापारी र व्यापारमा संलग्न राजनीति कर्मीहरुले लाभ पाउने छन् । तर राष्ट्रको ढुकुटीमा भने गम्भीर आघात पुग्ने देखिएको छ ।
प्रस्तावित कानूनले ठूला कम्पनीहरुको सेयर किनबेच गर्दा राजस्व छल्न ‘चोरबाटो’ खोलिदिएको हो । साथै शक्तिशाली व्यक्तिहरुले अर्काको नाममा खोलेका कम्पनीको स्वामित्व आफ्नो नाममा ल्याउन पनि यो व्यवस्थाले मद्दत गर्छ ।
नेपालमा कयौँ नेता, कर्मचारी, सार्वजनिक पदमा रहेका व्यक्ति र ‘पावर ब्रोकर’हरुले अर्काको नाममा कम्पनी खोलेर व्यापार व्यवासाय गरिरहेका छन् । ठूला ब्यापारीहरुले समते आफन्त, कर्मचारी आदीको नाममा कम्पनी खोलेर कारोबार गर्ने गर्दै आएका छन् । घरजग्गा लगायत क्षेत्रमा सम्पत्ती सञ्चित गर्नमा पनि यस प्रकारको विकल्पको उपयोग हुँदै आएको छ ।
कोभीड अघि ब्यावसायिक जगतमा एउटा ‘नाता’ खुब चर्चामा थियो,– ‘सालोकी श्रीमती’ । व्यवासयी, कर्मचारी, नेता धेरैले आफ्नो सालोको श्रीमतीको नाममा सम्पत्ती राख्न थालेको चर्चा चुलिएको थियो । अहिले पनि कयौँ नेता, कर्मचारी र ब्यापारीले आफन्त, कर्मचारी आदीको नाममा सम्पत्ति थुपार्ने तथा कम्पनी खोलेर कारोबार गर्ने गरिरहेका छन् ।
विगतमा त्यसरी खोलिएका कम्पनीको स्वामित्व आफ्नो हातमा ल्याउँदा ‘पूँजीगत लाभकर’ छल्ने गरी सरकारले नीतिगत व्यवस्थाको प्रस्ताव गरेको हो । बजेटको अङ्गको रुपमा प्रस्तुत भएको उक्त विधेयक पारित गर्नु सत्ता साझेदार दलको ‘दायित्व’ बन्ने गर्छ ।
यसका लागि अतिरिक्त संसदीय झमेला व्यहोर्नु नपर्ने भएका कारण अर्थमन्त्री पुनले चलाखिपूर्ण ढंगले कानून संशोधन गर्न खोजेको आन्तरिक राजस्व विकागका एक पूर्व महानिर्देशकले बताए ।
के हो संशोधनको व्यवस्था ?
आयकर ऐन २०५८ ले कुनै कम्पनीको शेयर स्वामित्व परिवर्तन हुँदा के कस्ता कर लाग्ने र आय विवरणमा कस्तो नियम लाग्ने भन्ने व्यवस्था गरेको छ । कुनै कम्पनीको ५० प्रतिशत वा त्योभन्दा बढी सेयर अन्य व्यक्ति वा संस्थाले खरीद गरे भने ऐनको दफा ५७ आकर्षित हुन्छ ।
![](https://www.arthapath.com/wp-content/uploads/2024/06/Dafa-57-768x570.jpg)
यो व्यवस्थाले ३ वर्ष अघिको तुलनामा ५० प्रतिशत वा त्योभन्दा बढी सेयर स्वामित्व परिवर्तन भएको दखिए पुराना मालिकले निःसर्ग गरेको (आफ्नो नियन्त्रण छाडेको) मान्छ । यसका लागि एक पटकमात्रै किनबेच हुनु पर्छ भन्ने छैन । कुनै एउटा कम्पनीको सेयर ३ वर्ष भित्र सयौं व्यक्ति तथा कम्पनीले फरक फरक मितिमा किनेको छ भने पनि यो दफा आकर्षित हुन्छ ।
यस्तो अवस्थामा कम्पनीले पुरानो मितिमा लिएको ऋण, ब्याजजस्ता दायित्व तिर्न वा पहिलेको नोक्सानलाई घटाएर कर तिर्न पाउँदैनन् । यस प्रकारले आधा स्वामित्व फेरिनुलाई ऐनले नयाँ कम्पनी स्थापना भएकै जस्तो मानेको छ । त्यसै अनुसार कयौँ कठोर प्रावधानहरु पुरा गर्नुपर्ने व्यवस्था छ ।
अहिले यही व्यवस्थामा संशोधन गर्न खोजिएको हो । संसदमा प्रस्तुत विधेयकमा दफा ५७ को उपदफा १ लाई संशोधन गर्ने भनिएको छ ।
यस्तो छ प्रस्तावित संशोधनको व्यवस्थाः
![](https://www.arthapath.com/wp-content/uploads/2024/06/2-tax-act-768x300.png)
के फरक पर्छ ?
यो व्यवस्था कार्यान्वयनमा आयो भने बैंकहरुजस्ता धेरै पूँजी र कम नाफा हुने कम्पनीबाहेक कुनै पनि कम्पनीको सेयर किनबेच नहुने परिस्थिति बन्न सक्ने करका अधिकृतहरु बताउँछन् । नेपालमा सबैजसो निजी कम्पनीहरुको चुक्ता पूँजी असाध्यै कम छ ।
त्यस कारण नयाँ लगानीकर्ताले सेयर स्वामित्व किनेर होइन, पूँजी थपेर कम्पनी कब्जा गर्ने प्रबृत्ति बढ्ने छ । उदाहरणका लागि अहिले कुनै कम्पनी १ करोड पूँजी लिएर चलेको छ र उसले वर्षमा १० अर्बको ब्यापार गर्छ भने त्यस्तो कम्पनीको सेयर किनबेच गर्दा महँगो लाभकर तिर्नुपर्ने हुन्छ ।
तर अब मिलेमतो गरेर त्यो १ करोडको सेयर किन्दैन । बरु १ करोड १ लाख थप पूँजी (सेयर) लगानी गर्न सक्छ । त्यसो गर्दा पहिलेको मालिकको स्वामित्व स्वतः ५० प्रतिशतभन्दा तलमा झर्छ । त्यसपछि बाँकी स्वामित्व पनि किनेर पुरै कम्पनी आफ्नो नाममा बनाउन सक्छ ।
यस्तो तरिकाबाट पुरानो दायित्व तिर्न नपाइने लगायत दफा ५७ को कानूनी व्यवस्थाहरु कार्यान्वयन हुने छैनन् । फलस्वरुप कम्पनीहरुको संस्थागत सुशासनमा पनि गम्भीर दख्खल पुग्न सक्ने करका अधिकारीहरु बताउँछन् ।
त्यतिमात्रै होइन, पूँजीगत लाभकर तिर्नुपर्ने दफा ९५को व्यवस्था पनि ‘बेकार’ बन्ने छ । यसबाट कम्पनीहरुले अर्बौँ रुपैयाँ राजस्व छलि गर्नसक्ने छन् । हामीले नेप्सेबाट सेयर बेच्दा गर्दा वा घरजग्गा बेच्दाकै बखतमा जस्तो कुनै कम्पनीको स्वामित्व बेच्दा पनि विक्रेताले लाभकर तिर्नुपर्छ ।
![](https://www.arthapath.com/wp-content/uploads/2024/06/3taxs-768x423.jpg)
उदाहरणका लागि, कसैले सुरुमा प्रतिकित्ता १०० रुपैयाँ लगानी गरेर कम्पनी खोल्यो । उसको कम्पनीको कारोबार राम्रो भयो र पछि उसले प्रतिकित्ता ५००० का दरले सेयर बेच्यो । यस्तो अवस्थामा उसलाई १ कित्तँको ४९०० नाफा देखिन्छ । त्यही नाफाको निश्चित प्रतिशत सरकारलाई लाभकर तिर्नुपर्ने हुन्छ ।
ऐन अनुसार स्वदेशी प्राकृतिक व्यक्तिले पूँजीगत लाभ रकमको १० प्रतिशत, स्वदेशी कानूनी व्यक्तिले १५ प्रतिशत लाभ कर तिर्नुपर्ने व्यवस्था गरेको छ । विदेशीको हकमा व्यक्ति वा संस्था जे भए पनि लाभ रकमको २५ प्रतिशत कर तिर्नुपर्छ ।
नेपाल धितोपत्र बोर्डमा सूचीकृत नभएको कम्पनीको हकमा यस्तो कर अग्रीम रुपमा बुझाउनु पर्ने व्यवस्था ऐनको दफा ९५ ‘क’ले गरेको छ ।
तर प्रस्तावित संशोधन पारित भयो भने यी कुनै पनि व्यवस्था पालना गर्नु पर्दैन । पूँजीगत लाभकर पाउनबाट सरकार बञ्चित हुने छ । विगतमा एनसेललाई जसरी पूँजीगत लाभ कर तिर्न बाध्य पार्ने आधार सरकारसँग हुने छैन । यो अवसरको लाभ धेरैले उठाउने छन् ।
कतिपय कर अधिकारीहरुका अनुसार राजनीतिकर्मी, कर्मचारी र ब्यापारीले स्रोत नखुलेको सम्पत्ती लगानी गरेर सुरु गरेका कयौँ व्यवसाय आफ्नो स्वामित्वमा ल्याउने ‘प्रपञ्च’ हुनसक्छ । यस व्यवस्थाले सम्पत्ति शुद्धिकरणमा पनि भूमिका खेल्ने उनीहरु बताउँछन् । तर यस्तो संभावना कति गहिरो हुन्छ भन्ने चाहीँ विधेयक पारित भएर कार्यान्वयनमा आएपछिमात्रै थाहा हुने छ ।
कसका लागि ल्याइयो यस्तो कानून ?
आधिकारिक रुपमा सरकारले यस्तो व्यवस्था गर्नुका पछाडी ‘लगानी प्रबद्र्धन गर्ने र मूलतः सूचना प्रविधि क्षेत्रमा अधिक लगानी भित्र्याउने’ उद्देश्य रहेको बताएको छ । स–साना आईटी कम्पनीहरुमा लगानी थप्नु आवस्यक भएको भन्दै यस प्रकारको कानूनको जरुरत ठानिएको सरकारी अधिकारीहरुले बताएका छन् ।
तर करका अधिकृतहरु स्वदेशी वा विदेशी लगानी थप्न यस्तो कानूनको जरुरत नभएको बताउँछन् । सानो पूँजी भएका कम्पनीहरुको स्वामित्व हस्तान्तरण गर्न पनि खासै समस्या नभएको उनीहरु बताउँछन् । बरु यस्तो कानूनी व्यवस्थाको उपयोग ठूला कम्पनीहरुले गर्नसक्ने अधिकारीहरुको आशंका छ ।
अहिले प्रमुख दूरसञ्चार सेवा प्रदायक कम्पनी एनसेल यस्तै चक्रब्यूहको सिकार भएको छ । पहिलेदेखि नै ज्यादै धेरै ‘खेलोफड्को’ र ‘नीतिगत छेडखानी’बाट हुर्किएको यो कम्पनी पुनः एक पटक नयाँ ‘खेलाडी’हरुको चंगुलमा परेको छ । त्यसैलाई केन्द्रित गरेर एकाथरि शक्ति केन्द्रले यो कानून ल्याउन प्रेरित गरेको हुनसक्ने स्रोतले बतायो ।
अर्कातिर केही राजनीतिकर्मीहरु पनि अरुका नाममा कम्पनी खोलेर ठूलै ब्यापार गरिरहेको अनुमान गरिँदै आएको छ । उनीहरुलाई आफ्नो लगानीको कम्पनी आफ्नै स्वामित्वमा तान्न यस प्रकारको व्यवस्था गरिएको हुनसक्ने अनुमान कतिपयको छ ।
जलविद्युत्, सूचना प्रविधि र कतिपय खाद्य तथा पेय उत्पादनक कम्पनीहरु, स्वास्थ्य संस्था लगायतको स्वामित्व परिवर्तनमा पनि पूँजीगत लाभकरबाट बच्न यो नीति अत्यन्तै उपयोगी हुनसक्ने देखिएको छ ।
अर्थमन्त्री पुनले बजेटमार्फत् ३० खर्बको सूचना प्रविधी सेवा निर्यात गर्ने महत्वाकांक्षी ‘सपना’ बाँढेका छन् । यसका लागि कयौँ नीतिगत सहजिकरण गर्ने प्रतिबद्धता जनाएका उनले घुमाइ–फिराई राज्यको ढुकुटीमा निर्मम प्रहार गर्ने गरी कानून प्रस्तुत गरेका छन् ।
यसलाई अर्थ मन्त्रालयमा लामो समय विताएका अवकाशप्राप्त एक अधिकारीले ‘सुन्दर सपना बाँडेर आफ्नो स्वार्थ साँध्ने प्रपञ्च भएको हुनसक्ने’ टिप्पणी गरेका छन् ।