मध्यरातमा खप्की खाएर फर्किए महाप्रसाद, अर्थतन्त्र ‘ध्वस्त’ पारेको प्रधानमन्त्रीकै आरोप
काठमाडौँ । आफ्नो कार्यकालको अन्तिम समयमा प्रधानमन्त्रीलाई भेट्न पुगेका नेपाल राष्ट्र बैंकका गभर्नर महाप्रसाद अधिकारी निराश भएर फर्कनु परेको छ ।
बुधबार मध्येरातमा बालुवाटारबाट निस्कँदा उनी निकै निराश देखिएको प्रधानमन्त्री कार्यालयका एक अधिकारीले बताए ।
केही अघिदेखि नै उनले प्रधानमन्त्रीसँग समय मागिरहेका थिए । लामो प्रतीक्षा पश्चात् बुधबार बालुवाटारमा ‘दर्शन–भेट’ पाएपछि उनले आफ्ना कुरा संक्षेपमा त राखे नै, गभर्नरमा पुनः नियुक्तिको अपेक्षा पनि अघि सारे ।
तर प्रधानमन्त्री केपी शर्मा ओलीले ‘राष्ट्र बैंकमा बसेर अर्थतन्त्र विगारेको’ भन्दै उनको आलोचना गरेका थिए ।
सरकारका आग्रहहरुलाई नजरअन्दाज गरेको र अर्थतन्त्र विगारेका कारण सरकारले नै आलोचना व्यहोर्नुपरेको भनेर प्रधानमन्त्रीले गभर्नर अधिकारीलाई हप्काएको बालुवाटार स्रोतको दाबी छ ।
स्रोतका अनुसार केन्द्रिय बैंकमा दोहोरिने महाप्रसादको सपनालाई प्रधानमन्त्रीले लत्याइदिएका छन् । ‘अवसर दिँदा गलत काम गर्ने, अहिले चोखिन खोज्ने’ भनेर प्रधानमन्त्रीले उनलाई निराश पारेका हुन् ।
गभर्नर अधिकारीले प्रधानमन्त्रीलाई ‘कन्भिन्स’ गराएर दोस्रो कार्यकालका निम्ति राजी बनाउने प्रयासअन्तिमसम्म पनि छाडेका थिएनन् । उनले आफ्ना नीतिहरुका कारण मुलुकको अर्थतन्त्र गम्भीर संकटमा जानबाट जोगिएको तर्क गरेका थिए ।
उनलाई कार्यकाल दोहोराउने भोक मेटिइसकेको थिएन । त्यसैले आफ्नो कार्यकाल सकिनुभन्दा एक साता अघिसम्मका लागिमात्रै उनले बिदा लिएका थिए । जम्मा १० दिनका लागि कार्यबाहक गभर्नरको जिम्मेवारी निलम ढुंगानालाई दिएर ५ चैतबाट उनी बिदामा छन् ।
यही बीचमा प्रधानमन्त्रीलाई सम्झाउन सकेको भए कार्यकाल दोहोराउन सकिने आशामा उनी थिए । यसका लागि उनले पूर्व राष्ट्रपति विद्यादेवी भण्डारीको पनि सहयोग लिन चाहेको बालुवाटार निकट स्रोतको दाबी छ ।
बहालवाला गभर्नरलाई बढीमा एक पल्ट पुनः नियुक्ति गर्न सकिने कानूनी व्यवस्था छ । त्यसो गर्दा छनोट र सिफारिसका लागि अलग्गै समिति बनाएर नियुक्ति प्रक्रिया अघि बढाउने झण्झट नै हुँदैन । मन्त्रीपरिषदमा सिधै प्रस्ताव लगेर पुनः नियुक्ति गर्न सकिन्छ ।
आफूलाई गभर्नर बनाएका प्रधानमन्त्रीले नै यस्तो व्यवहार गर्लान् भन्ने सायद उनलाई अपेक्षा थिएन । भलै, पछिल्लो समय ओली सरकार र गभर्नर अधिकारीबीच तारतम्य मिलिरहेको थिएन ।
तर बुधबारको भेटपछि गभर्नर अधिकारी अब पूर्णतयाः ‘एक्जिट मूड’मा पुगेका छन् । अब उनको पुनःनियुक्तिको संभावना लगभग अन्त्य भएको छ ।
